طرق صيد البوري

طرق صيد البوري

طرق صيد البوري

البورى من الاسماك الحساسة جدا علشان كده لازم نختار وقت الصيد وعدة الصيد المناسبة صيد البوري يكون بهدوء شديد ولو بتصطاد بالنهار لازم تختار مكان لا ينعكس الظل المترتب عن خيالك على المية يعني لا تجعل الشمس في ضهرك علشان ظلك مايجيش على المية بالذات و انت بتصطاد بالبوصه اليد

صيد البوري بالبوصة اليد العادية

نزولك فى الميه دايما بيكون بالراحه جدا لحد م تستقر الفله على وش الميه لأن البوري سمكه جبانه ، كمان حركة الفله بتبقي سحب بسيط لأن فتحة بقه صغيره ف بياكل من الطعم حتت صغيره ، كمان لما تيجي ترد على غمزة السمكه و سحبها متردش جامد لأن بقه ضعيف وكمان لو السمكه كبيره ممكن تقطع معاك أو تطفش السمك اللى حضرته فى المرمي

بطريقه من اثنين

1- الصيد بالفلة

أقصي شعر اساسي ممكن نستخدمه 25 اما الترميل من 12 حتى 20 و السنار يكون 10او11 او 12

صيد البوري بالفلة يكون طعمك عجينة ومش اي عجينة لازم تكون طرية( عجينة صيد السمك ).

بالنسبة لشعر الترميل بيكون قصير يعني فرع 25 سم والتاني 20 سم

العمق اللي بتصطاد علية يكون نص عمق المية

2- صيد البوري بالربع (المشنقة)

شعر اساسي 25 طولة نص عمق المية ، شعر الترميل 15 الى 20 ويكون بدون فلة و السنار مقاس 5 أو 6

وبيكون عدد من 5 الى 8 سنانير بنعمل 3 طولهم حوالي 10 سم والباقي طولهم حوالي 5 سم , وبنحط رصاص شريط حوالين مكان توصيل السنانير ,الصيد بيكون بعجينة ناشفة , بتحط العجينة على الرصاص وبتنزلها المية بالراحة لغاية ما اللبلوب بتاع البوصة يوصل اول المية في الطريقة دي البوري هو الي بيوقع نفسة وعلشان كده سموها المشنقة. وممكن نستخدم طعم تاني مع الطريقة دي وهو السردين تشيل راس السردينة وتفتحها من بطنها وتعلقها على السناير يعني تخلي السنانير كلها جوة بطن السردينة وتغرزها فيها من جوة .